शाळा ही केवळ ज्ञान देणारी किंवा मुलांना घडवणारी संस्था नसते तर ती एक विचार रुजवणारी, आपलं पर्यायाने देशाचं भविष्य पेरणारी संस्था असते. अशावेळी ही संस्था जितकी सजग, समकालीन आणि सशक्त असेल तितकं आपलं समाज म्हणून असणं, वाढणं आणि बहरणं अधिकाधिक आरोग्यपूर्ण असतं.

अक्षरनंदन शाळेतील दोन माजी विद्यार्थ्यांचे आम्ही पालक. ह्या शाळेत मुलं शिकत असतानाचा काळ त्यांच्यासाठी आनंदाचा तर होताच पण आम्ही पालक आणि शाळा यांचं नातंही अगदी खास होऊन गेलं. शाळेमुळे आम्हालाही खूप पालक मित्र मैत्रिणी मिळाले.

आम्हाला अक्षरनंदनचे पालक बनून आता ७ वर्ष झाली. थोडक्यात सुरवातीपासून आत्तापर्यंत आम्ही किमान ७ वेगवेगळ्या वर्गात पालक बैठकांना बसलो आहे, ७ वेगवेगळ्या वर्गताईंसोबत मुलाच्या शैक्षणिक आणि इतर प्रगतीवर (!) चर्चा केली आहे आणि ७ मूल्यमापन प्रक्रियांमध्ये सहभागी झालो आहोत. इतरही सर्व ताईंसोबत काही न काही कारणांनी आमचा संपर्क येत असतो. या अनुभवाच्या शिदोरीवर हा अभिप्राय लिहीत आहे.