पुण्यातील नु. म. वि.  प्रशालेचे मुख्याध्यापक ना.ग. नारळकर यांच्या स्मृतिप्रीत्यर्थ सामाजिक व शैक्षणिक क्षेत्रात उद्योजकतेला व उपक्रमशीलतेला चालना देण्याच्या उद्दिष्टाने १९८९ मध्ये ना.ग. नारळकर फाऊंंडेशन ची स्थापना झाली.

पुण्यातील नु. म. वि.  प्रशालेचे मुख्याध्यापक असताना केवळ सहा वर्षात (१९३६ ते १९४२) नाना नारळकरांनी शाळेचा कायापालट केला. विद्यार्थ्यांच्या व शिक्षकांच्या ठायी स्वदेश व स्वभाषा प्रेम निर्माण केले. त्यांच्यातील उपक्रमशीलतेला वाव देऊन ज्ञानलालसा जागी करून त्यांच्या मनाची क्षितिजे रुंदावली. मुलांमधील व शिक्षकांमधील गुण हेरून, त्यांना नवनवे उपक्रम करण्यास उत्तेजन दिले. त्यांनी शिक्षक हा मध्यवर्ती घटक मानला.

स्वाभाविकपणे असा वारसा लाभलेल्या फाऊंंडेशनची सुरुवात शिक्षकांची जाणीव अधिक प्रगल्भ करणाऱ्या त्यांना प्रोत्साहित करणाऱ्या गुणवर्धक शिबिरांनी झाली. महाराष्ट्राच्या कानाकोपऱ्यातून स्वेच्छा येणारे शिक्षक ही या शिबिरांची खासियत होती.

उपक्रमातील शिक्षकांना जाणवणाऱ्या अनेक अडचणींना उत्तरे शोधण्याच्या निकडीतून अक्षरनंदन शाळेचा जन्म झाला. पूर्वतयारी म्हणून मुलांसाठी विविध विषयांना आणि माध्यमांना जोडणारी प्रकल्प शिबिरे घेतली गेली. भाषा व विज्ञान केंद्रे चालवली गेली.

वंचित गटातील मुलांसाठी शिबिरे, पूरक वर्ग ह्याच्या जोडीला शेती, आहार, आरोग्य, ऊर्जा या व सलग्न  विषयांमध्ये पर्यावरणीय दृष्टी व जीवनशैली यांचा परिपोष करणारे वैकल्पिक केंद्र उभे करण्याच्या दिशेने फाऊंंडेशनच्या कार्याचा भविष्यात विचार करण्याची कल्पना आहे.